Cobro de facturas pendentes de abono por parte de concellos

Foi publicado no BOE o pasado 25 de febreiro de 2012 o Real Decreto Lei 4/2012, de 24 de febreiro, polo que se determinan obrigas de información e procedementos necesarios para establecer un mecanismo de financiamento para o pago de provedores das entidades locais.

Esta importante medida afectará a aqueles provedores de concellos, ou entidades pertencentes a estes na súa totalidade, que tendo débedas pendentes de cobro que cumpran unha serie de características, posto que poderán cobrar con certa axilidade ditos créditos xa que a entidade pública accederá a un financiamento específico para pagar aos mesmos.

As características das débedas para acollerse a este plan de financiamento son:

1. Terán que ser vencidas, líquidas e esixibles.
2. Que a recepción, no rexistro administrativo da entidade local, da correspondente factura, factura rectificativa no seu caso, ou solicitude de pago equivalente teña ocorrido antes do 1 de xaneiro de 2012.
3. Que se trate de contratos de obras, servizos o subministros incluídos no ámbito de aplicación do texto refundido da Lei de Contratos do Sector Público aprobado polo Real Decreto Lexislativo 3/2011, de 14 de novembro.

As entidades públicas afectadas por esta medida tiveron ata o 15 de marzo de 2012 para entregar un listado dos provedores e débedas que cumprían os requisitos anteriores xunto cun plan de axuste de gasto público obrigatorio.

A norma permite que os provedores consulten nos concellos as débedas declaradas e que soliciten que se actualice información se esta non fose correcta para o que é importante xustificar a realidade das débedas e que cumpren as características. Neste sentido nos parece importante recalcar a relevancia que pasa a ter o dispoñer de documentos de entrada en rexistro público das facturacións como xeito de garantir a legalidade.

A norma cita como criterios para ordenar os pagos tanto a antigüidade das débedas como a posibilidade de redución voluntaria das mesmas ou que as débedas teñan sido instadas ante os Tribunais de Xustiza antes do 1 de xaneiro de 2012.

Jorge Rodríguez
Socio responsable do área Económica Financeira de Algalia